Ci dit del lu e de l'aignel,Ki beveient a un duitel.Li lus en la surse beveitE li aignels aval esteit;Irïement parla li lus,Que mut esteit cuntrarïus,Par maltalent parla a lui :« Tu me fes, dist il, grant ennui. »Li aignel[ez] ad respundu:« Sire, de quei ? » « Dun ne veiz tu?Tu m'as cest' ewe si trublee,N'en puis beivre ma saülee;Arere m'en irai, ceo crei,Cum jeo vienc ça, murant de sei. »Li aignelez dunc li respunt :« Sire, ja bevez vus amunt,De vus me vient ceo que ai beü. »« Quei! fet li lus, maudiz me tu? »Cil li ad dit: « N'en ai voleir. »Li lus respunt: « J'en sai le veir.Cest me[ïs]mes me fist tun pereA ceste surse, u od lui ere,Ore ad sis meis, si cum jeo crei. »« Que retez vus (ceo), fet il, a mei?Ne fu[i] (pas) nez dunc, si cum jeo quit. »« E ke pur ceo ? li lus ad dit,Ja me fez tu ore cuntrereE chose que tu ne deis fere. »Dunc prist li lus l'aignel petit,As denz l'estrangle, si l'ocit.
Issi funt li riche seignur,Li vescunte e li jugeür,De ceus qu'il unt en lur justise;Faus' acheisun(s) par coveitiseTreovent asez pur eus confundre:Suvent les funt a pleit somundre,La char lur tolent e la pel,Si cum li lus fist a l'aignel.
