Dictes moy où, n'en quel pays,Est Flora, la belle Romaine;Archipiada, ne Thaïs,Qui fut sa cousine germaine;Echo, parlant quand bruyt on maineDessus riuière ou sus estan,Qui beauté ot trop plus qu'humaine?Mais où sont les neiges d'antan!
Où est la tres sage Helloïs,Pour qui fut chastré et puis moynePierre Esbaillart à Sainct-Denys?Pour son amour ot cest essoyne.Semblablement, où est la royneQui commanda que BuridanFust gecté en vng sac en Saine?Mais où sont les neiges d'antan!
La royne Blanche comme lis,Qui chantoit à voix de seraine;Berte au grand pié, Bietris, Allis;Haremburgis qui tint le Maine,Et Iehanne, la bonne Lorraine,Qu'Englois brulerent à Rouan;Où sont elles, Vierge souuraine?`...Mais où sont les neiges d'antan!
Prince, n'enquerez de sepmaineOù elles sont, ne de cest an,Que ce reffrain ne vous remaine:Mais où sont les neiges d'anten?
